الإعلام الفتحاوي/شبكة فتح العاصفة الإخبارية Just another WordPress site
مقالات مشابهة
رام الله/ شبكة فتح العاصفة الإخبارية
على صفحات المفوضية المركزية للإعلام يشرع القيادي الفلسطيني الدكتور / محمد عودة بكتابة سلسلته الجديدة بعنوان ( فيروزيات 2 )حيث أنه صاحب الملكية الفكرية لسلسلة ( فيروزيات 1 ) السابقة التي نزلت على حلقات متعددة ، ويمتاز أسلوب الكاتب في هذه الحلقات بالأدب الساخر بكلمات شعبية خفيفة على غرار( فن الملولوغ ) ، ————————————الحلقة الأولى : يسعد صباحك ست فيروز ، ماني عارف هاي السني شو جايب عصفور الجناين بس يلي بعرفه انه احنا وانت عم نكبر سني عن سني والزمن هاجم هجوم على عهد الولدني و تركتينا يا ست فيروز نحتفل برأس السني حتى ضاع الهوى وتغيرت فينا الدني و فرفطت سنوات العمر .
قبل هسني ما كنتي بتبيعيني وكنتي وكل سنة بتحبيني اكثر من يلي قبلها شو يلي صار حتى بعتيني على مفرق العمر ؟.
سني عن سني يا ست فيروز صباحنا العربي صار دنيي جديدة عنوانه النبي ابراهيم واماراته المزعومة والتطبيع والتتبيع وبشارة عليكي مؤتمر النقب سافر على المغرب ،واحنا لساتنا في شوارع القدس العتيقة بندور على الفرح الضايع مثل ضياع شادي (طبعا شادي لقيناه في المخيم بيحضر حالو يصير زعيم) .
والله يا ست فيروز الهوى منو فايق ، فتشنا على الدوا وللأسف ما لقيناه لا بالصيديلية ولا في القلب. وطير المسا يا ست فيروز الي جاي من سفر طويل مفكر الدني دني وعلى باب الدارة بكيت الاغاني و الموواويل وسهروا اثنيناتهم سوا على العتمة من غير ما يطفوا القناديل،اصلا القناديل مطفية لانه لا عاد في كهربا ولا بنزين ولا حتى مي.
وبعد هيك بتسالي يا ست فيروز لوين رايحين؟ما حد عارف لوين لكن الكل عارف انه عم نتلفت خايفن.يمكن لو سألنا فانغيليا بانديفا غوشتيروفا هي تقلنا لوين رايحين ومع مين صافين ؟ مع اوكرانيا ولا مع روسيا.
السني يا ست فيروز ما اجان المطر لا من شمالي ولامن قبلي والغيم ما لملم اطرافه.
الله يستر من سنين المحل .خايف يا ست فيروز انه كرومنا ما تغزل محبة وشهد وعناقيد. والعنب ما راح يعصر عوافي ويقطر سكر ليوم العيد،وكرم العلالي ما عاد عنقودو إلنا لأنه بعد اتفاق الغا وكاريش يا دوب يطلعنا خصلة من العنقود الاسود الحلو لانه شلومو والي وراه صاروا شرايكنا بالعنقود ويمكن بالحلم.
ومع هيك عم نحلم بوطن أكثر دفا من يلي عنا ،نحلم بوطن ما يوزعنا قوافل وجحافل لاجين ، نجوب بحار العالم بحثا عن وطن بديل.
تعبنا يا ست فيروز ونحن نبحث في بلاد الغربة ، ولا زلنا نسأل الجبل البعيد ان كانوا خلفه حبايبنا واذا بعدن حبابينا؟
سني عن سني وشعوبنا بتصغر واوطاننا بتصير اكثر وحشة اما قيادات لبنان وبلدان اخرى ما بدي اذكرها مش خوف!!!!!بتزيد غنى وبتتكرش مثل الطبل الكبير التي بيعلا صوته كل ما فِضي اكثر.
لا زال يا ست فيروز المهاجرين والمهجرين بغنوا ردني الى بلادي وبيدَورو في الغربة عن قوارب تردهم الى اوطانهم من غير خوف من الغرق وعشان يضمنوا يعودوا الى احيائهم احياءٌ يوما ما، وانا حكيتلك قبل هلمرة ما حد راح يردك لبلادك انت لازم تردي حالك والمهجرين مثلك ما حد راح يردهم.
يا ست فيروز احنا رغم الالم والفقر بنحبك لانا بنحب لبنان.
